मन्हा एसटीनां परवास

मन्हा एसटीनां परवास
💐💐💐💐💐💐
******************
... नानाभाऊ माळी 

बिनकामनां ऱ्हातस त्या आपला मव्हरे ऱ्हातस!कामवाला बठ्ठा आपला नांदम्हा ऱ्हातस!कामवाला तसा कमीचं दिखतसं!मी भी बिनकामना सें!बीनकामनांसंगे बिनकामनाचं ऱ्हायी!आशी गनित तें नई नां?का मन्ही नजर बिनकामनी तें नई? काय भी म्हना पन माले आज तश्या आनभव उना!

कालदिन मी शिरपूरथून शिनखडं (शिंदखेडा) एसटीम्हा उभा परवास करी उनू!एसटी चोपडा-नवापूर व्हती!गाडीनां अवतार दखी बिचारा ड्रायवर दादालें माननं पडी!एसटी बट्ठी ढक ढक व्हयेलं दिखनी!आथी-तथी तिन्ह्या आतड्या-रोदड्या लमकी ऱ्हायंतत्यात!खिडक्या निस्त्या हाडूक-पासुयी मोक्या व्हयेलं सारख्या घसी घसी नाची ऱ्हायंत्यातं!काचं खिडकीम्हा घासायी 'कूच कूच'करी आवाज करी ऱ्हायंत्यात! शिरपूर-शिंखडंरस्ते खड्डा तें एस्टीना जीव लेवा मांगे व्हतात!खड्ड उन का टायर धडक्क!धड्डक!असा आवाज करी गाडी आनी बठेल परवासीस्ना हाडके मोक्या करांमांगे लागेल व्हतात!🤔

लिखता लिखता मी इसरी गवू!बिनकामनालें बिनकामना डोयालें दिखतसं!मी एसटीम्हा हुभा परवास करी ऱ्हायंतू!शिरपूरथून शिंनंखडं एसटी खड्डा टाईटूई पयी ऱ्हायंतीं!एसटी टायरना जीव लीं पयी ऱ्हायंती!टायर भी उचकेलचं दिखनातं!खड्डाम्हा आंग टाकी खुशाल एसटीलें दणकाडी
ऱ्हायंतातं!एखादा धल्ला काठी टेकीटेकी,डुलत डुलत चालो तशी गाडी मव्हरे सरकी ऱ्हायंती!गाडीमां बठेल बाया तें निस्त्या गाया दि ऱ्हायंत्यात,"रानम्या डायवर आम्हना हाडके मोडी टाकी काय कोनजानें!गाडी निस्ती नाचाडी ऱ्हायनां!"

डायवर कसेल व्हता!पन खड्डा आढावू व्हतात!बिचारा एसटीनीं सेवा करी ऱ्हायंता!धक्कला खेडा उनात पन लाल पाटीनी एसटी कोठेच थांबनी नई!मी खिडकीगंमं हेंगडा वाकडा व्हयी बाहेर दखी ऱ्हायंतु!बाहेर निय्यगार वावरे दिखी
ऱ्हायंतातं!कामोळे,बाजरी वार्गीवर नाची ऱ्हायंतातं!पानीनां शीतडा दिखी नई ऱ्हायंता!आंगे पांगे बिनकामनं तनपट दिखी ऱ्हायतं!आगल्ला, बिचवा रस्तानां आंगे नाची ऱ्हायंतात!रुचकीन,येड्या बाभूई,येरंडेलं या झाडे दिखी ऱ्हायंतात!बिनकामनां त्या नजरे पडी ऱ्हायंतात!🌹

मी भी खिडकीगंमं आथी तथी मान मयडी-मयडी दखी ऱ्हायंतु!मन्हा धक्का एक धल्लीलें लाग्ना!तीं किद्रीस्नी बोलपन्नी,"कारे भो आठे एसटीमां हुब ऱ्हावालें जागा नई!तु काब्र बीन कामना आंग हालायी ऱ्हायना!नाची कुदी ढुकी ऱ्हायना!आंगलें चिटकी ऱ्हायना!पऱ्हा व्हये तथा!डोक धव्यबरफ पिकी गें नां! चाया ग्यात नई का आजून?वय गयी, सोय येल दिखत नई आजून!"

धल्ली डोया तानी दखी ऱ्हायंतीं!
धल्लीनां सबद आयकी बठ्ठा एसटीम्हानां लोके मनगंम दखी ऱ्हायंतात!मी तें कोल्लाखटक सकत लागी गयतु!सोतानां तोंडले झोडी लेवो आसं वाटी ऱ्हायतं!एसटी टायर घसी पयी ऱ्हायंती!वावरेंस्ना तरोटा, इचवा,रुचकीन,येड्या बाभुई,आगल्ला माले दखी चिडायी ऱ्हायंतात!बिनकामनां,बिनकामनाले उचकायी ऱ्हायंतातं!शिंनंखडांनं स्टॅन्ड उन तसा दरवाजा हुगडी!मन खट्ट व्हयी घरगंमं पयेत ऱ्हायनु!
🙏🌷🙏🌷🙏🙏🌷🙏🌷
**************************
... नानाभाऊ माळी
(मु.पो.ता.शिंदखेडा,जि.धुळे)
हडपसर,पुणे-४११०२८
मो.नं-९९२३०७६५००
दिनांक-०९ऑगस्ट २०२३

Comments

Post a Comment

Popular posts from this blog

सोनं सोडी पित्तयमांगे पयी ऱ्हायनात🌹

सोनं सोडी पित्तयंमांगे पयी ऱ्हायनात 🌹🌹🌹🌹🌹🌹🌹🌹 *************************** ... नानाभाऊ माळी                गाड्या पयी ऱ्हायन्यात!मोट्रा पयी ऱ्हायन्यात!मानसे पयी ऱ्हायनात!बठ्ठ जग पयी ऱ्हायन!पयनं काय थांबेलं नयी से!थांबावू भी नयी!पयल्हे पयानी गती धिमे व्हती!मानसे चांगला व्हतात!येरायेरलें धरी संगे मांगे लयी चाली ऱ्हायंतात!तव्हयं मव्हरे जायी जग जिकानं हाव्हरं नयी व्हतं!यांनं कुस्मरं त्यांनंघर जाये!त्यान्हा खाराम्हानं लोनचं यांन्हा जीभवर पघयेतं ऱ्हायें!सासुले सासुले येरायेर संगे मांघे निंघी जायेत!🌹    जश्या काय बदलालें लाग्ना!उज्जी हावरं सुटनं!मानुस्की कुचमालं व्हवालें लाग्नी!मव्हरे जावानी हुडी वर-दुडी मांगे लाग्नी!...तठे मानोस कूचमालं व्हयी ग्या!तठे मानोस मानुसकी सोडी पैसास्नी गड्डीवरं बठी ग्या!मानोस्कीना हुंडूक दाबायी ग्या!येरायेरनीं कुडची-चड्डी धोतर व्हडी व्हडी मांगे ढकलाले लाग्नातं!सोता खोया खोसी पयालें लाग्नातं!हावरं मांगे लाग्न!पैसा नावनां उचकेलं डंग्रा खिसाम्हा जायी बठना!खिसा फुगी फुगी,छाती फुगालें लाग्नी!फुगऱ्यास्ना पाह्यरें सत...
Read more

मरणा आधी सावध व्हावे!आपले स्वहीत करून घ्यावे!

मरणा आधी सावध व्हावे आपले स्वहीत करून घ्यावे 💐💐💐💐💐💐💐 ********************* ... नानाभाऊ माळी जगणं परम साध्य आहें!जन्म मिळाला हे खरं आहें!त्यात मनुष्य जन्म मिळाला हे सर्वात मोठ भाग्य आहें!माणूस म्हणून जन्माला आलो हे भाग्यातील मोठं भाग्य आहें!जन्म मिळणं, आणि त्या नंतर जन्मानंतर मरण निश्चित आहें!मरण कसं असावं बर?सहज साध्य मरण जगणं सुकर असतं!आनंद देतं,सुखं पेहरीत, आपलं जीवन कोणाच्या कामी येत असेल असं जीवन जगून मनाची तृप्ती अन समाधानी जीवन जगत असतांना मरण आलं तर तें मरण यशस्वी जीवनाची इतिश्री असतें!अशा अनेक व्यक्ती त्यातून पार होतं गेल्या!चांगलं तें देऊन गेले!कोणी तत्वचिंतकं असेल!कोणी साधा शेजारी पण परोपकारी आणि सतत आपल्यासाठी धावून येणारा व्यक्ती असेल तर अशा व्यक्ती जीवनहित साधून निघून जातात!इतरांच्या काळजात नाव कोरून निघून जातात  समाधान संत सानिध्यानें होतं असतं!संतांच्या अध्यात्मिक मार्गदर्शनातून आपण समाधानाच्या जवळ पोहचत असतो!तत्वचिंतक अन संत सतगुणांचा प्रचार करीत असतात!आपण सदगुणांच्या संगतीत जातं राहिलो तर,आपल्याला परमेश्वर प्राप्तीचा आनंद मिळतं राहिलं!मग आपला जन्म सिद्ध करण्...
Read more

चला जाऊया गड-किल्ल्यांवर लोहगड किल्ला(भाग-०२)

चला जाऊया गड-किल्ल्यांवर        *लोहगड किल्ला*            (भाग-०२) 🚩🚩🚩🚩🚩🚩🚩 ********************* ... नानाभाऊ माळी  न थांबता प्रवास हा चाललाय कुणीकडे स्थळ वेळ काळ थेट   उभ्या छातीवर  कडे!🚩 उंच उंच डोंगरावर उभे डोलणारी झाडे घेई अंगडाई सृष्टी ही  येथे शूर शिपाई खडे!🚩 उंच भू माथ्यावरी पडती भिंतीस तडे लढ म्हणता मावळे चाले शस्र घेऊनि पुढे!🚩 लोहगड किल्ला उभा लोह पाऊल तें पडे सुरतचीं लूट सारी  खजिना लोहगड चढे!🚩  रविवार दिनांक ०२ जून २०२४ रोजी श्वास साहसात एकजीव झाले होतें!प्राण कंठात घेऊन शौर्याच्या ढालीवर तलवारीचे वार सहन करीत होतें!डोळे मावळे होऊन इंच इंच पुढे सरकत होतें!होय इतिहासातील पाने जीवंत झाली होती!शौर्याचं एक एक पान फडफडतं होतं!तलवारीचे खन्न खन्न आवाज कानी पडत होतें!तोफांचां बडीमार कानी येत होता!मी इतिहासातील युद्धभूमीवर होतो!चित्त रनांगणावर होतं!घनघोर युद्ध सुरु होतं!मावळे मायभूमीसाठी लढत होतें!शौर्य गाजवीत होतें!शत्रूला अस्मान दाखवीत होतें!पराक्रमाची शिकस्त सुरु होती!जीवन मरणाच्या भिन्न ...
Read more