फुगा फुटी खालें उना
फुगा फुटी खालें उना
🙏🤔🙏🤔🙏
***************
...नानाभाऊ माळी
भाऊ-बहिणीस्वन!...मी जपेल व्हतु!..आनी सप्पन दखी ऱ्हायंतु!......गय्यर सप्पन दखी ऱ्हायंतु!......
"माले गंजज सावा वाटस...मी डेडोर व्हयी फुगत ऱ्हावो!..माले गंजज सावा वाटस!..मी लब्बरनां फुगा व्हयी वर वर उडत ऱ्हावो!माले गंजज सावा वाटस मी हावामां निस्त वरवर उडत ऱ्हावो!..जिमीनलें पाय टेकोचं नई!माले गंजज सावा वाटस बठ्ठास्ना तोंडे मुक्सा बांधी ठेवो!हात्मा दिंडक धरी हात दुखा पाउत
निस्तज शेपालत ऱ्हावो!मी सांगेल तेच बकत ऱ्हावो,वकत ऱ्हावो!..माले गंजज सावा वाटस बठ्ठास्नि मन्हा डोयावरी जग देखो!मी जे दखाडसु तेच दुन्यांनी दखो!...माले आक्सी वाटत ऱ्हास!...मी बोलेल सबदचं बठ्ठास्ना काने पडो!कोन कितला का आराया मारेनां खल्ली बहिऱ्यावही जावोत!मी मन्हा नाके जे सुंगत ऱ्हास!तेच
बठ्ठास्नि सुंगो!कोनी कितल का आत्तर मारी सुंगालें सांगेनां पुरता बिन वास्या व्हयी जावोत!🙏
काय मज्या यी पन!!बठ्ठा मी आनी मीच ऱ्हासु!मन्हा आंगे पांगे भी कोनी फटकावू भी नई मंग!
मन्हा सबद झेलागुंता बट्टी दुन्या पायंजोडे बठी तरसत ऱ्हाई!मी तरसावसु बठ्ठास्ले!हिरानां
तोलन्हा सबद ऱ्हातीन मन्हा! मी आखो सांगानं इसरी गयथू!..मी सांगसू तव्हय यांय उगी!मी
सांगसु तव्हय यांय मावंयी!रात भी मेरी!सुरज भी मेरा!सब कुच्छ मेरा!मी सांगसु तथ हेट्या ऱ्हाई!
मी सांगसू तथ वऱ्हा!🙏🤔
दुन्या झुकस!..अहो!.. झुकाडनं पडस!आपले तथानी म्हन चालनार नई आते!म्हने,"जिस्की लट्ठी उसकी भैस!" ..आपलं आंस से ,"ज्यानं दिंडक भरीम,काम करे ..तोहरीम!"..मंग मी सातवा आस्मानंवर ऱ्हासु!तठेंग आडर दिसू,"आरे चोट्टास्वन मी मीचं से!तुम्ही तुम्हीचं सेतस!मन्हा पायंखालना झिरोयास्वन मी रावण से!मीचं तो सिकंदर से!मीचं कंस से "मी" मीचं ऱ्हासु!मी जरासंध से!दुशासन से!मी फुगत ऱ्हासु!"🙏🤔
तुम्ही माले बायीबुयी टाक व्हयी! खोल माटीम्हा दाबी दिन्ह व्हयी!मन्ह शरीर बयी गये व्हयी!माटीम्हा सडी गये व्हयी!पन मी जित्ता व्हतु!जित्ता से!जित्ता ऱ्हासु!मन्हा जीव से अमर!मरन नई से माले!आत्मा कधी मरस का येडास्वन?तुम्हना नल्लीनां घोट व्हसू!मी तुम्हनां रंगत पिपासू व्हसू!तुम्हलें घटयाम्हा दयसू!मी पाप्पी धोत्रा काया रंग पंघरी
कलीयुगम्हा भी जित्ता ऱ्हासु!🤔
तुम्हलें बंमकाड़तं ऱ्हासु!आते ते कलीयुग से!..मन्ह युग से!बठ्ठा काया धंदा धव्व्या करी सांगसू!काये धन पिव्ये करी दखाडसु!लेखक,कवी,गायकस्मा एकजीव व्हयी तुम्हनां आस्सल ग्रंथस्नि डिट्टो काफी करी मन्हा नाववर खपाडसु!बठ्ठ चोरीचारी जग दुन्यांम्हा शाजूक बनी फिरसु!मी मीचं से!भलती खोल बुद्धी से!जराख आंगे येऊ द्या!तुम्हना चाडाम्हा दि बटसु!🙏🤔
मी फुगेल डेडोर से!फुगी फुटनू तरीभी डेडोरचं ऱ्हासु!मी उडता फुगा से!कितली भी टाचणी टोचा तुम्हीनं!.. फुटीसनी आखो फुगा व्हसू!तुम्हनां तोंडलें मुकसा कोनी
भांदातं?मन्ही जादू से ती!मी काय भी करू शकस!मी उज्जी जहिरी नाग से!डसनू ते जित्ता ठेवावू नही!जह्येर बठ्ठा आंगम्हा नाची तुम्हना!मी कलियुगनं
धुत्रूंम से!मन्हा धुत्रूंमलें गनज फसी पडात!कलियुगनां मी कली से!मालें बट्ठी दुन्या खुली से!ग्रंथ चोरी!पैसा चोरी!हराम खोरी या सुखमां मी आंग धोयी ऱ्हायनू!तुम्हलें धोनं व्हयी ते या!मिल बाट के खाऊ!बठ्ठास्ले येडा बनायी एक ताटम्हा जेवूतं!खोटनाट नक्ट्टा नूक्ट्टा व्हयी उजात जगत ऱ्हाउत.….!"...एकाएक डोकावर थंडगार पानी पडनं!..मी
चमकीस्नि उठनू!🙏🤔
"माय वं काय येडा चाया लायी दिन्हा तुम्हीनं उठतस नई??!"मी सप्पन दखी ऱ्हायंतु खटलांनी!..मन्हा हात वारा दखी!येडाचाया दखी तोंडवरचं पानी फेकी मार व्हत!....सप्पन भी कव्हय खरं व्हस व्हयी का हो!..मी ते भेमकायी जायेलं से!
🙏🤔🙏🤔🙏🤔🙏
🌷🌷🌷🌹🌹🌹
...नानाभाऊ माळी
मु.पो.ता.शिंदखेडा,जि.धुळे
(ह.मु.हडपसर,पुणे-४११०२८)
मो.नं-७५८८२२९५४६
९९२३०७६५००
दिनांक-१७एप्रिल२०२२
Comments
Post a Comment