आन्नेड रस्ता
आन्नेड रस्ता
**********
🌷🌷🌷🌷
...नानाभाऊ माळी
भाऊ-बहिनीस्वन!
नमस्कार!...
...काही लोके जानी बुजी उलगेलपना करत ऱ्हातंस!..कसं ते दखा!....
"ओ आन्नेड गावंनां अन्नाडू!निट हाकलनां औउत!बय आन्नेड आन्नेड,तिरपा तिरपा काय हाकली ऱ्हायना औउत!बांगा बनायी ऱ्हायना का दुन्याले?" भाऊस्वन हाऊ 'आन्नेड' सबद नेम्मनं खेतीमां राबनारा कुंनबिना मुखे येत ऱ्हास!सबद आक्सी डोयांमव्हरे येवावर वाटस,मानोस पहिलेंग वांदरनां रूपम्हा व्हता व्हयी!खरंज जव्हय या धरतीवर वांदरं जलमलें उनं व्हयी तव्हय
झाडे व्हतीनं!वाल्या वाल्या येली व्हतीन!वांद्रेस्ले खावालें झाडन्हा पाला,पांटा,फय-फुयी व्हयी!..पाग्रा पाग्रा तोडी!कव्व्या फांट्यासन्या आग्ऱ्या पोटले खायेत व्हतीन!वांद्रे मंग सोतानां दोन पायवर हुभा ऱ्हाई चालालें लाग्नात व्हतीन!त्याचं
वांद्रेस्ना मानोसनं रुपडं मव्हरे पोटगुंता पयेत फिरना व्हयी!🌷
पोट भरागुंता मानोस जितला पयेत फिरना व्हयी!तितला मनोस्ना बुद्धिना इकास व्हयना व्हयी!ज्यांना इकास व्हयना, मव्हरे मुकली लोकवस्तीम्हा ऱ्हावालें लाग्ना!गावमां,सहेरम्हा ऱ्हावालें लाग्ना!जो आयशी, कामचुक्कार,खाटलावर आडाधट पडी ऱ्हानारा व्हयी!कामनं दुक लागेल व्हयी,त्या मांगे ऱ्हाई ग्यात व्हतीन!आन्नाडू ऱ्हाई ग्यात व्हतीन!त्यांस्ना इकास व्हयना नई व्हनार!गावना इकास नई व्हयना व्हनार!मांगे मांगे ऱ्हायना व्हतीन!धड रस्ता नई त्या गावस्ले व्हनार!काय इकास व्हयना व्हयी गावना?आन्नेड रस्ते,आन्नेड गावनां मानोस शिकनां नई!खरचं आन्नाडुचं ऱ्हाई गया व्हयी!🌷
मानोस मांगे काब्र ऱ्हाई ग्या!...ज्यांनी घाम गाया नयी!गाडं धुरायी भवडनां नई!आथा-तथा तोंडलें मुक्स भांधी फिरना!डोया पारखी व्हयना नई!नजर पारखी व्हयना नई!कोठे पोटगुंता चारा कुर्तडालें ग्या नई!आडा-हुभा मुल्लानंम्हाचं आडकी बठनां!मव्हरे जावानी द्यानंत नई!आंग चोरी निस्ताज कोपरे कापरे दपत बठनां!कोन मव्हरे जास व्हयी त्याले मांगे व्हडनारा उलगेल अन्नाडू मांगे ऱ्हाई ग्या!अन्नाडू ऱ्हाई ग्या!बुद्धीलें जंग लागी ग्या!आंगम्हा काम ऱ्हायन नई!हुभारी धरी फिरना नई! कायेजथिन जिद्द नई!तो पक्का हातीपाई बांगा बनी ऱ्हायना!आन्नेड रस्ते भवडत फिरनां!तो शाजूक व्हयना नायी!तो आन्नेड रस्ते चालतं ऱ्हायना!आन्नेड आउतं हाकलतं बठना!🌷
जो नड-निडलें कामलें येस तो देव मानूस ऱ्हास!जे गाव दुसरा गावंनं दुःख दखी पयेत येस ते गाव गौरवशाली ऱ्हास!काना कोपरें, बल्लानां आंगे पांगे दपेल धाकल्सा गावे जव्हय उजायामां यी नाव काढी ऱ्हायनात!गावंलें नेम्मंनं रस्ता नई!हिवाया-उंडांया पावसाम्हा कायमनीच बोंब असा आन्नेड गावेस्मा सोना-हिरानां तोलनां माणसे जनमलें येतस उनात!गावनं नाव tv म्हा
चमकत ऱ्हास!लोक उजायामां यी रहायनातं!तठला गनज हिरा जग दुन्यांलें उजाये दि ऱ्हायनात!चमक दखाडी ऱ्हायनात!तठलाचं बाकिना आन्नाडु पडमथ्यास्ले नेम्मंन रस्ता दायी ऱ्हायनात! रस्ता दखाडी ऱ्हायनातं!आन्नेड रस्ते आन्नेड गावनी एकमूठ गावनी शान व्हयी ऱ्हायनी!त्या गावनां लपेल हिरास्नि वयख व्हयी ऱ्हायनी!🌷
आते जग मुकल बदली ऱ्हायनं!डोया हुगाडी नेम्मंनं रस्ते चालनारा सोना सारखा लोके बदल घडायी ऱ्हायनात!काही पडमत ली बठेल आन्नाडू,आन्नेड रस्ते औउत हाकली,मतलबी लांडगा बनी ऱ्हायनात!त्यास्ना कावाम्हा भोया भाया शिकार व्हयी ऱ्हायनात!बकऱ्या मातर
लांडगास्नि शिकार व्हयी ऱ्हायनात!🌷
आन्नेड रस्ता खंदी-खुंदी टापेटाप व्हयी ऱ्हायनात!आन्नाडू आन्नेडपन सोडी डोयां हुगाडी ऱ्हायनात!गावं बदली ऱ्हायन!माणूस बदली ऱ्हायना!आते आन्नाडूपन सोडी शाने रस्ते पयनं पडी!आन्नेड रस्ता खंदीखुंदी जगलें जोडना पडी!वयख मानोस्कीनी मनोस्पानं करी देनी पडी!🌷
🌹🌹🌹🌹🌷🌷
*******************
...नानाभाऊ माळी
(मु.पो.ता.शिंदखेडा,जि.धुळे)
ह.मु.हडपसर,पुणे-४११०२८
मो.नं-७५८८२२९५४६
९९२३०७६५००
दिनांक-२४एप्रिल२०२२
Comments
Post a Comment