बाट्टोड बाख्खरस्ना मेय
बाट्टोड बाख्खरस्ना मेय
*****************
🤔🤔🤔🤔🤔🤔
...नानाभाऊ माळी
😳😳😳😳😳
भाऊ बहिणीस्वन!
गंजंज दाव दखा दावामां येल से! काही लोके उज्जी वाच्चाय ऱ्हातसं!खोडाय ऱ्हातसं!चौदा पायन्हा ऱ्हातसं!डोकं उठाड ऱ्हातसं!चिंनगाडू ऱ्हातसं!
सुमडीम्हा कुंब्डी करनारा ऱ्हातसं!जठे जातीन तठे उमटी पडतस!अश्या लोकेस्ना पायलें आनी मनलें दावन भांदता येत नई!दावन हिसडी-वासडी, तोडी-ताडी जठे नई जावानं तठे आडा व्हयी हुभा ऱ्हातसं!काही ठिकाने उग्रा व्हयी,उगार बनी कामे करत ऱ्हातसं,आनी येड्या बाभूइंगत काटायी फांटी व्हयी आथाईन-तथाईन टोचात ऱ्हातस!यास्न नाव कोन हागनखडीमां काढावू नई असा ऱ्हातसं!या सोतानां सगा सायीस्लेभी घोड सांगी फुरगधाडावर बसाडी मिरावत ऱ्हातसं!
फुरगधड चाली चाली भागस नी येय उनी का मांगली लाथ छाताडावर मारी बठस!या कोल्हानंपोटे जलमलें येल चत्रा आनी पक्की गाठ भांदेलं लोके कव्हय कोठे खड्डाम्हा टाकतीन याना नेम नई ऱ्हास!कव्हय
मव्हय तें चत्रायवार आपली गम्मत दखी हासी खुसी लेतस!आपली मज्या दखत ऱ्हातसं!आपले घोमाली कव्हय मव्हरे निंघि जातस तेचं आपला
ध्यानमा येत नई!🤔
भाऊ-बहिनीस्वन!
भरन ठी वक्खरं चालत व्हयी तठे या माटी खावऱ्या,गच्ची गाठ भांदेल लोके.. नेम्मनं भिडी जातस!खोया खोसी खोसी इसड्याफोक गाया टिकाडत ऱ्हातसं!आनी आशी काही कांडी फिरावतंस तें आपुन त्यासन आयकी!..बांगा व्हयी!बीन भरननं आउत हाकलतं फिरतसं!आपला भोयापननां फायदा उचली या फिदी फिदी हासत ऱ्हातसं!आपुन शेल हासडी बैल तंगांडतंचं ऱ्हातसं!त्या मातर खिजाई-कुदायी,दातड्या काढी आपली मज्या लेत ऱ्हातसं या आपले किद्रावत ऱ्हातसं! या बाख्खरस्ना हावू येडाचाया कवलगून चाली हायीचं समजत नई आपले!🤔
वावरे..गावनां पोटे आंगे-पांगे ऱ्हातसं!बांदेबांध ऱ्हातसं!पहिले मोठ्ठलां बांध ऱ्हायेतं!वरसारदमां गवत डोकापार माती जात ऱ्हाये! तव्हय त्यांनगम दखालें येय ऱ्हाये नई!मव्हरे एक घरन्हा चार घरे व्हयी ग्यात!एक कुयीनां,एक खानदाननां,नक जिव्हायीनां... लोकेस्ले जमीन आपोरी पडालें लाग्नी!वावरेस्ना बारीक बारीक तुकडा तुकडा व्हयी ग्यात!अथा- तथा वावर सोडी नेम्मंन मेर (बांध)मझारचं घुसालें लागी ग्यात!
मेर कोरी कोरी..बुथडा खोडी खोडी मेरं पुरा पुरा चिप्पट व्हयी ग्यात!मेर कोरी कोरी निरुंग करी टाकात!दुसरांगुंता झिंजानं सोडी त्यास्ले धुतरावालें लागीं ग्यात!पैरा-वैरालें,आउत फिरालें जागाचं ठी नई!जठे फाटेल व्हयी तठे ठिगय लावान सोडी,बोटे घाली आखो फाटेल भोक मोठं करानं काम या बाट्टोड लोके करत ऱ्हातस!🤔
मेर कोरी कारी एक एक पाम्हेरंथिन वावर वाढतं ऱ्हायन!तितलां भांडनं तंटा वाढालें लागी ग्यात!मुगंमुगं ऱ्हावोना!!पन नई.. दांडगाई करी,आली गलीमां लढाई झगडा झमकालें लागी ग्यात!या छाक्टा पैसासनी खुवारी करी,या मातेल बाख्खर कोर्टानी पायरी चढालें लागी ग्यात!तरीभी ऱ्हायेल घुर्गटायेल,चिपट्ट मेरवर दोन्ही
गंमथिन बैल चारान्ह काय कोनी सोड नई!चुकीस्नि आथानं जित्रब मेर वलांडी तथानां मेरनां पोटे घुस्न रें घुस्न तें या बयखेल उग्राफटक लोके भरीम कईकनां टकोरा जित्रबनां मुसडावर दि बठतस!काल्या-वाल्याकरी, अल्लायी-उल्लायी,आवकाया करी..मुक्क जित्रब आथांनं आंगे पयेत सुटस!मव्हरे मव्हरे मुक्का जित्रबलें भी समजालें लागीं गये, 'आपली चरानी हाद्द कोनती से!तथानी हद्दीमां जावान नई!वाटा पडी जायेलं से भो!'कोना मुचुक कोन आडतं नई!पन आडा चालनारस्ना डोकामां कायम वाकडा किडा वय वय करतं ऱ्हातसं🤔
उपादीखोर लोके आखो दांगडो करी आंगेनां येडा-बांग्या, गताड्यास्न उज्जी वाईटनां वाटावर टपेल ऱ्हातसं!फुस्लायी-पटलायी नेम्मंन
फ़साडानं आनी गोताम्हा
आनानं कामे या खुमखुमी चढेल बाट्टतोड लोके करत ऱ्हातसं!सवसारनां भांडवाडा करालें टपेल ऱ्हातसं!त्यास्ना धाबानां वंडीवर आपला कपडा कव्हय सुखाडालें
टाकी दितीन याना नेम नई ऱ्हास!बागे बागे आपला कपडा उतारी कव्हय नागं करी टाकतीन याना नेम नई ऱ्हास!उज्जी खनपट ऱ्हातसं!चिंनगायखोर ऱ्हातसं!घनावू कुशीत ऱ्हातसं!.. म्हणीसनी या मोठ्ठला राजकारणी!..सरकारी अधिकारी!..यासनी वयखथुन आपले आडा जावालें दखतंस! धमकी देवान काम करत ऱ्हातसं!आटा-साटावरी काटा काढानं काम करत ऱ्हातसं!पोक्कय
हवा भरानं काम करी अफवा फैलावानं काम करत ऱ्हातसं!वरथिन आखो गाया टीकाडतं
ऱ्हावान्या!समोरला वावरम्हा
ढोरे सोडी देवानं!हुभा पीकनं नुकसान करानं!तोंडनं भरगडं चालू ठेवानं,मव्हरलालें हैरान करी सोडानं!दुसरांगमथुन गुनरक खावालें भेटनारा.. अश्या या टूक्कारं-बेक्कार लोके गंजज फुक्ट्यास्ले!..दारकुट्टयास्ले दारूपाजी गाया टिकाडालें, आचकय-बाचकय बोलालें संगे लयी फिरतस!गरीब मानोसनां फसकारा दखत बठ्तसं!आप्ला तोंडले कव्हय पोतारा फिरायी जातीन सांगता येत नई!🤔
आपुन तनगी-तुनगी जित्ता ऱ्हावागुंता,पोटनी भूक भागाडांगुंता हाफा मारत ऱ्हातसं! इज्जतदार मानोस भ्याईभुई हात टेकी देस!आपला जोजार व्हडतं मव्हरे दिन मोजत ऱ्हातंस!आपोरा-सपोरा दिन मोजी दिन काढत ऱ्हासं!🤔
कटायी-कुटायी ईकी-फुकी सस्तामां त्या पाप्पीस्ना पले कायी जिमीनलें,मायलें,वावरलें भांदी देतंस!अश्या लोके कोना तयतयालें भी भ्यातस नई!कायभी निमित्त खाले लोकेस्मा कायम झमकाडानं कामे करत ऱ्हातसं!सोता भी तोंडलें झुलुझुलु करत ऱ्हातसं!यासले लोकेस्ना हुपारा व्हत ऱ्हास!यास्ले देवनी भीती वाटत नई!ज्यास्नागुंता या पाप्पी धोत्रा!या बोखलायेल आडावू भेंड.. कायाकुट्ट कामे करत ऱ्हातसं!गच्ची पैसा कमाईस्नि भी उलट सुलट बकत ऱ्हातसं!तीचं यास्ना घरम्हा जलमलें येल हाळवाय त्यास्नागम ढुकीभी दखतस नई!🤔
भाऊ बहिणीस्वन!
मंग बठ्ठास्ना तोंडनां तुकडा व्हडी खानारा या चायावाला लांडगास्ना हाल पायलं कुत्रामांयेक व्हयी जातस!सोता हरामनं कमायेल ऱ्हास!धयडपने लाय गायी दारसे
बसी ऱ्हातसं!पोरेसफाईन भीक मांगी पोट भरत ऱ्हातसं!पोरे व्हकारा भी देतस नई!या 'यमन्हा' बठेल टकोराम्हा एक दिन पादडायी जातस!चांगलं काम करानं फय चांगलंचं भेटत ऱ्हास!वांगल कर ते जस पहेंरो तस उगत ऱ्हास!हेंकय लावा ते काटा
दिखतीन!काटा उगतीन!सांगानी गोठ आसी से..भगवाननां घर देर ऱ्हास!अंधेर नई!🤔
"पह्येरी पह्येरी हेंकय पह्येरा
हेंकयनां काटा उनातं वर
पायमां घुसनातं काटा खोल रें
हिरदमां जखमां करतीस घर🤔
तयतयानी फुक्टी भेट रें
काये नरकन्ह हुघडी दार
या चेंदामेंदा व्हतीन पाप्पी
धर्तीनां व्हयी हालका भार🤔
कली युगनी वांधी कायी रें
पाप वाढायी मुकला भार
खोटा चोट्टा पाप्पी धोत्रा या
दुन्यामां करतीन उज्जीकहार🤔
जव्हय यांय उगानी येय व्हयी
उजाये घुसी च्यारीमेरं
सत्कर्मानं पुण्य उगी रें
सोर्गानां वाचाडी मुकला फेर🤔
चुंग्यान चुंग्या पयतीन मव्हरे
लेवालें पानी भरेल हेर
हिरवाईनी नजर दखांपहिले
बाख्खरस्नि निंघी जायी खेर😌
🤔🤔🤔🤔🤔🤔
*****************
...नानाभाऊ माळी,
मु.पो.ता.शिंदखेडा,जि धुळे
ह.मु.हडपसर,पुणे-४११०२८
मो.नं-७५८८२२९५४६
९९२३०७६५००
दिनांक-२०फेब्रुवारी२०२२
Comments
Post a Comment