💦पानीगुंता कटबन लढ💦

💦पानीगुंता कटबन लढ💦

💦💦🌹🌹💦💦

.....नानाभाऊ माळी

भाऊ बहिनीस्वन!

💦💦चाळीस ते पन्नास हजार लोके गोया व्हयेल सेतस!नेता,मंत्री आणि सरकारी अधिकारी बठ्ठा झाडी-झुडी गोया व्हयेल सेतस! बठ्ठा लोके खुश सेतस!नेम्मंन पंधरा सोळा लोके..... त्याम्हा सामाजिक कार्यकर्ता, इरिगेशन डिपार्टमेंटनां सचिव आनी अधिकारी,जलसिंचन मंत्री, पालकमंत्री,आणि आखो मुख्यमंत्री यास्ना फौजफाटा लिसनी गाड्या उदघाटननां ठिकाने उनात!...आनी मुख्यमंत्री नी बटन दाबी बारीन्या पाट्या उघड्यात!...आनी .....आनी.... दूधनां मायेक फेसकूटायेलं पाणीनां लोंढा उस्मई पाटनां। चारीमा घुस्ना!आस्सली सयसयता नागनां मायेक हेटलाआंगे पयेत सुटना!वरला आंगेनां समुंरना गत पानी पाटम्हा पयेत ऱ्हायनं!....."धरणनं" उदघाटन व्हयनं!समुंदर व्हयेल निय्ये पानी हेट्या कायी-भुरटम्हा घुसन!.....!"....आनी... आनी... खाटला वरथीन गय्यरी निंदम्हायिन मी धपकनं खाले पडनू!.....मी.... मी.. भाऊस्वन मन्हा खान्देशनं सप्पन देखी ऱ्हायंतु!.....🌷🌷🌷🌷🌷🌷🌷🌷🌷🌷💦💦💦

💦💦💦भुक्या -तिष्या खान्देशनं सप्पन कव्हय पूर व्हयी!...निय्ये-हिरव पानी मन्ही जिमीन कव्हय पी!..भुक्या-तिष्या खान्देशी बठ्ठा आस लायी बठेल सेतस!एक दुसरावर शेन फेकी उज्जी खे खेतस!खे तुम्ही खेयी ऱ्हायनात!भुकी जनतालें मारी ऱ्हायनात!पानी..पानी....पानी करी धल्ला-पल्ला गयी ऱ्हायनात!💦

....💦आते!....आते ऐकला दुखला नका खाऊ!सेतस खान्देशी बठ्ठा भाउ!धरणे हिरवाई आनागुंता बठ्ठा आपुन एकमझार ऱ्हाउत!बठ्ठास्ना आपुन सलदार सेत का?फुकट्या बोल आयकी लिसुत?खान्देशनी एक मूठ करूतं!.....धरणे हक्कानां हिसकी लिसुत!!!!!🌷🌷

🌹🌹🌹🌹🌹🌹🌹🌹

.....आनी....आनी...दखा भाऊस्वस्वन आपला खान्देशनं चलींतर...............🌷🌷🌹🌷🌹💦💦💦💦💦💦

जथीबन तथी कायी-लाल माटीनी!....भुरी माटीनी जिमीन नजर आवरात नई तठलोंग पडेल दिखी ऱ्हायंती!बांधेबांध आवलोंग कुऱ्हाडलें भ्यायी गनज झाडे हुभा दिखेत!जिमीनमां जीव नई!पानी नई!पीक नई!ढोरेस्ले चारा नई!पैसा नई!सोतांनां पोटलें भाकर नई!रात-पाटलें हुभा झाडेस्ना बुंधडांवर कुऱ्हाडीस्नि घाव करा!हुभा झाडेस्नि हत्या करी!खून करा!तीस-चाळीस फूटनां हुभा झाडे आडा व्हयी ग्यात! वखारम्हा ग्यात!पोटनी भूक ...भागणी!🌹💦💦

....एक नां खून करा....दुसरानी भूक भागनी!रीत-रह्येनं बनी गयी जगन्ही!कुऱ्हाडनी करात वार! पोटगुंता झाडलें मार!मव्हरे काय?...मानोस भी उरावू नई!मानोस पोट फोडी खायी!पुरा हाडकायी जायी!मानोस मानोसलें खायी!पण....काब्र?..... कारण जिमीनम्हा पानी नई!🌹💦

पुरा खान्देश तरसी ऱ्हायना!लोके पोट भरागुंता सहेरस्मा पयी ऱ्हायनात!बिन पानीनां वावरे पडीत व्हयी ऱ्हायनात! बिनकामनां काटाया झाडे वावरलें व्हडी ऱ्हायनात!आंगलें झुलता येड्या बाभूई कस व्हडी ऱ्हायनात!बांगा बनी शानला माणसे सहेर पयी ऱ्हायनात!पानी येवागुंता कवी.....गीत गायी ऱ्हायनात!शाना सुरता डोकेबाज रंगत पियी ऱ्हायनात!कोल्ली नदीमां धोनं मुकल सोतां धोयी ऱ्हायनात!धरण व्हवागुंता खान्देश जागे व्हयी ऱ्हायना!💦

गनज ठिकाने दिखस भाऊस्वनं लोकेस्ना तोंडले मुकसा भांदेलं ऱ्हातंस!जोर जब्बरी करीस्नि हात छाटेलं ऱ्हातंस!धक्कला-मोठा घरम्हानांस्ले संस्थाम्हा चिटकाडी देतस!तेज तर्रार बुद्धीलें गहान ठी देतस!तत्व ज्याले म्हंतस भाऊस्वनं ऊसनां चोथा करी टाकतंस!काया वावरनी धव्वी मलई वरपी उरपी त्या शानला खातस!....सांगा मंग भाऊस्वन त्या धरण व्हवू देतस??💦🌷

मन्हा खान्देशनं भाऊस्वनं कायेज से मोठं!धरणगुंता जग दुन्यालें बोलनं पड खोटं!धिरे धिरे निंघी ग्यात वरीस साठ!कोल्ली खटक जिमीन आते भरत नई पोट! भाऊस्वनं...कोल्ला पडेल सेतस बठ्ठा नदीनां काट!दूर दूर लोंग मव्हरे दिखत नई पानीनी वाट!

पहिले भाऊस्वन वरसारदनी झडी लागे!...पंधरा-पंधरा दिन हुघडे नई!पंढायंम्हा पानी म्हाये नई!व्हाई व्हाई धाबानी खारी खड्गन ऱ्हाये नई!सऱ्या-किल्चंनम्हातून टीप टीप करी पानी जाये व्हाई!उडतीनम्हा ठेयेलं सार-समान जाये भस्सम व्हयी!घरमा माय- बहीण व्हवा-बेट्या थकी जायेत घटयावर दयी दयी!इजा चमकी चमकी बठ्ठा पोरें जायेत भ्यायी!.......आते... आते तो पानी पडत नई!जिमीननी भूक मातरं अजिबात भागत नई!दूर दूर दूरलोंग पानी गया पयी!....तुम्हलें.....आम्हलें हाऊ उचडेलं पाऊस आजिबात जुमानत नई!डोयांघायी देव 

धवूत तो धरण लयी यी!ढोका ढोका मोटरनां पानी वावरम्हा व्हायी!🌷

     💦-----------------💦

...नानाभाऊ माळी

मु.पो.ता.शिंदखेडा,जि.धुळे

(ह.मु.हडपसर,पुणे-४११०२८)

मो.नं-७५८८२२९५४६💦

         ९९२३०७६५००

दिनांक-३०मे२०२१

(रोहिणी नक्षत्र)💦